Cobqha Thwjtim
Lub Zeem Muag
Vaajtswv txujlug has tas “Mej tub leeg has tas Yexus Khetos yog mej tug Tswv lawm, yog le ntawd mej yuav tsum ua mej lub neej kuas phim qhov kws mej nrug nwg koom ib txujsa. Mej yuav tsum muab sab rau ntseeg Yexus Khetos ib yaam le tug caag ntoo kws ntsa aav tub tub. Hab mej yuav tsum sawv kho kho ib yaam le lub tsev kws cov ncej txhus tub tub. Mej yuav tsum muab sab npuab tej kws mej tub kawm lug lawm. Hab mej yuavtsum naj nub ncu ntsoov ua Vaajtswv tsaug” (Kaul. 2:16-17). Tug ntseeg Yexus yuav tsum rau sab kawm Vaajtsvw txujlug, muaj tug tswv Yexus nyob huv lub sab, hab ua lawv Vaajtswv txujlug kws tub kawm taag lug lawm.
Peb ntshaw kuas pawg ntseeg muaj Yexus cov thwjtim kws txaus sab hlo ib leeg cobqha ib leeg ua Yexus thwjtim. Thaus peb nyeem Vaajtswv txujlug, nwg paab kuas peb paub Vaajtswv txujlug zoo. Thaus peb kawm Vaajtswv txujlug nrug lwm tug, nwg yuav paab kuas peb nkaagsab lub ntsablug tub tub nyob huv nqai Vaajlugkub ntawd hab nwg yuav paab txhawb kuas tug kawm ua tau lub neej lawv le nqai Vaajlugkub ntawd qha. Tug qha yuav paab kuas tug kawm qheb sab rua Vaaj Ntsujplig muab Vaajtswv txujlug hloov nwg lub sab tshab. Kev cobqha thwjtim yog thawj kaujruam moog rua kev muaj lub neej hloov dlua tshab. . Thaus ib tug ntseeg tso tsi tau txuj kev txhum kws nwg nyam ua tseg lawm, nwg cheemtsum ib tug ntseeg ua nwg tug phoojywg thov Vaajtswv paab hab txhawb nwg zug kuas kovyeej txuj kev txhum ntawd.
Peb ntshaw kuas cov ntseeg Yexus muaj Yexus cov thwjtim kws ua lub neej ci lossis ua timkhawv rua tuabneeg nplajteb kuas puab pum tug Tswv Yexus nyob huv cov ntseeg lub neej. Thaus tuabneeg nplajteb pum cov ntseeg lub neej hloov dluatshab lawm, tuabneeg nplajteb yuav pum tug Tswv Yexus cajsa nyob huv peb lub neej. Cov ntseeg yuavtsum ua timkhawv rua tej phoojywg kws nyob huv lub zej zog hab paab cuam lub zej zog thaus puab muaj kev cheemtsum. Koj hab kuv yog Yexus le thwjtim, peb teg dlejnum yog ua lub neej kuas lwm tug pum Yexus nyob huv peb.
Kev cobqha thwjtim yog dlaabtsi?
Uantej Yexus yuav rov qaab yaa moog sau ntuj ceebtsheej, nwg saamfwm kuas cov thwjtim moog coj tuabneeg lug ua Yexus le thwjtim (Mat. 28:19-20) . Kev cobqha thwjtim tseemceeb heev rua Vaajtswv lub tebchaws. Kev cobqha thwjtim yog coj tuabneeg lug ntseeg Yexus hab cobqha puab kuas puab paub Yexus zoo hab muaj lub neej hloov dlua tshab. Thaus ib tug ntseeg twg muab taagnrho nwg lub neej rua Yexus kaav lawm, Yexus yuav muab nwg lub neej hloov dlua tshab. Peb yuav tau cobqha cov ntseeg kuas puab tso Yexus lug kaav puab lub sab hab kuas puab ua lub neej rua Yexus. Thaus puab ua lub neej rua Yexus lawm, puab yuav txaus sab hlo qha txujmoo zoo rua lwm tug hab cobqha lwm tug ua Yexus thwjtim. Yexus hu koj hab hu kuv lug ua Yexus thwjtim hab cobqha lwm tug ua Yexus thwjtim. Peb yuav tau ua lub neej kuas luas pum Yexus nyob huv peb lub sab.
Kawm ua Yexus thwjtim hab moog cobqha lwm tug ua Yexus thwjtim
Cov tub kawm TEE yuav tau siv cov ntawv “Luj Hlub rua Yexus” hab “Caum Yexus Qaab” moog qha cov ntseeg tshab hab cov ntseeg kws tsi tau paub Vaajtswv zoo, kuas puab muaj lub neej hloov dlua tshab.
Lub sijhawm puab taabtom kawm TEE, puab yuav tau ua dlejnum cobqha thwjtim. Puab yuav tau qha lwm tug ua Yexus thwjtim. Thaus cov ntseeg kawm ua thwjtim hab yog Yexus ib tug thjwtim tseeb lawm, lub sijhawm puab kawm TEE puab txhaj yuav nkaagsab txug Yexus lub Neej kws cobqha cov thwjtim ua Yexus thwjtim.
Kuv yuav kawm tau le caag?
Peb yuav cobqha ib cov thawjcoj lug ua teg dlejnum nuav. Cov kws kawm TEE tav nyob huv mej pawg ntseeg yuav raug cobqha kuas puab txawj cobqha lwm tug ua Yexus thwjtim. Yog mej xaav kawm, nrug koj tug xwbfwb thaam, nwg yuav nrhav kev kuas koj tau kawm ua Yexus thwjtim.
